Artigos Recentes

Publicado o 22/04/2019

Caldoval consolídase como referente turístico en Ferrolterra na Semana Santa

O bo tempo e as actividades atraeron a numeroso público ao CIC.

Á falta dunha semana para rematar o mes, máis de 600 persoas acudiron a Caldoval para visitar o “balneum” romano e participar nas actividades didácticas que veñen realizando xs monitorxs do centro. Estes datos sitúan o mes de abril como o mellor do 2019 ata o momento e un dos mellores da serie histórica desde a apertura do centro en setembro de 2017.

A Semana santa rexistrou un tránsito constante de xente de diferentes procedencias. O grupo máis numeroso foi o de visitantes do resto de España, que supuxeron o 31% do total, seguido do público galego, co 29% e os veciños dos concellos de Ferrolterra co 26% . A porcentaxe de persoas procedentes de Mugardos foi menor (14%), o que reflicte o perfil  fundamentalmente turístico  do público visitante.

No que respecta á tipoloxía de público, as familias con nenxs foron o grupo máis numeroso, xa que constituíron case a metade de todxs xs visitantes (47%). Tamén foi importante o segmento das parellas (31%) e dos grupos informais (19%).

Por idades o conxunto máis numeroso foi o das persoas comprendidas entre os 30 e 65 anos (54%) seguido polxs nenxs de entre 5 e 15 anos (23%). Estes datos reafirman o compoñente fundamentalmente familiar do público de Semana Santa.

Do mesmo xeito os obradoiros didácticos realizados durante as festas tiveron unha grande acollida coa participación de 48 persoas.

Abril está sendo,polo tanto un dos meses con mellor resposta por parte do público. A este éxito están a contribuír de xeito importante as actividades deseñadas para público escolar polo concello de Mugardos e a concellaría de patrimonio Histórico.  No que vai de mes xa visitaron Caldoval 7 colexios que supuxeron aproximadamente 182 alumnos e aproximadamente uns 200 escolares participaron tamén nos “I Ludi Mugardensis”.